Vern dei mest sårbare mot publisering på SOME

[oss-to]

Den siste tida har vi sett døme på korleis barn og sårbare personar blir eksponerte på sosiale medium utan å forstå eller kunne seie nei. Saka i går om influensaren som delte videoar av søstera si med Downs syndrom, viser eit alvorleg problem: privat smerte og sårbarheit blir gjort om til innhald for følgjarar og likes.

Dette kan ikkje lenger vere opp til kvar enkelt forelder eller søsken å avgjere. Barn og menneske med utviklingshemming har, ifølgje barnekonvensjonen og menneskerettane, rett til privatliv og verdigheit. Når dei sjølve ikkje kan samtykke eller forstå rekkevidda, har vi som samfunn eit særleg ansvar for å verne dei.

Vi hadde aldri akseptert at nokon publiserer helsejournalen til ein 18-åring med Downs syndrom. Kvifor aksepterer vi då at videoar frå hennar mest sårbare augeblikk blir delt på plattformer der dei kan forfølgje henne heile livet?

Difor treng vi:

• Klare lover som set grenser for deling av bilete og videoar av barn og andre sårbare.

• Plattformar som får ansvar for å stanse utnytting og nedverdiging.

• Ein haldningsendring: likes kan aldri forsvare å utlevere dei mest utsette blant oss.

 

Dette handlar ikkje om foreldreval, men om rettstryggleik. Barn og sårbare personar skal ikkje vere råstoff for sosiale medium.

https://www.tv2.no/underholdning/refset-for-video-av-sosteren-skikkelig-ugreit/18044649/